BELE KI’AK MAIBÉ MORIS HO DIGNIDADE

“Agradese ba buat ne’ebé iha husi Maromak no esforsu nafatin tuir kbi’it ne’ebé Maromak fó, hodi hadiak moris iha futuru “.

Olandino da Costa Belo, L.Ap. nu’udar manorin ida ne’ebé moris iha Munisipiu mais oriental iha Timor Leste , Lautem, espesialmente iha Lospalos, 07 Marsu 1972.

Oan husi Manuel da Costa Belo ( matebian ) ho Arminda da Costa, uluk sei kiik iha mehi bo’ot hakarak sai lutu ba nasaun “ militar “, maibe realidade la tuir mehi ne’ebé nia hakarak.

Manorin mak nia naran estimadu mak “ Olan” ne’e la’ós sai lutu ba nasaun maibe liu husi nia matenek ne’ebé iha hodi desenvolve area edukasaun no agora dadauk asumi kargo Diretór iha Eskola Secundária Geral Lere Anan Timur ( LAT ) Lospalos.

Olan ki’ik ne’ebé nakonu ho mehii bo’ot hahu nia eskola primaria iha Sekolah Dasar Negeri (SDN) I Lospalos no finaliza iha tinan 1984.

Tempu kontinua la’o Olan kontinua nia estudu ensino pre sekundáriu iha Sekolah Menengah Pertama Negeri (SMPN) I Lospalos no remata iha tinan 1987.

Husik hela tempu kiik kontinua ba tempu adultu, Nia iha hanoin hakarak aprende buat barak, inklui siensia exata, nune’e nia hili kontinua estudu iha Sekolah Menengah Atas Negeri (SMAN) I Lospalos ne’ebé sai hanesan fatin hodi nia bele aprende no finaliza iha tinan 1990.

Mudansa ba moris nian kontinua muda kada loron, nune’e nesesidade mos kontinua aumenta, hanesan mos joven ida, Olan ho nia fitun Pisces koko atu hadiak nia moris, ho vontade rasik tuir teste sai hanesan Calon Pegawai Negeri Sipil (CPNS).

Hanesan proverbiu ka pepatah dehan “rezultadu sira la trai esforsu” Olan, Joven ne’ebé matenek no badinas hetan resultadu diak no pasa iha teste n’e, Nia kontinua kedas haknaar an iha Kantor Wilayah (Kanwil) Perindustrian dan Perdagangan Propinsi Timor – Timur iha tinan 1991.  

Mane Lospalos ne’ebé gosta los hahan produtu lokal ne’e, ladun satisfaz ho ninia abilidade, nune’e nia fahe tempu servisu no kontinua nia estudo iha Universitas Timor – Timur (UNTIM) agora sai hanesan Universidade Nasional Timor Loro sa’e (UNTL ) iha tinan 1997 no hili fakuldade “ Administrasi Negara “ .

Nia estudu labele finaliza tuir nia hakarak, iha tinan 1999 situasaun polítika komesa manas ona nune’e tenki hakotu nia relasaun ho universidade no para de’it iha semester 5.

Husik hela istoria triste ne’ebé hafalun ho ruin no ran iha momenta ne’eba, maibe la hamate nia vontade no espíritu, Olan ne’ebe nia kor favoritu mak azul no matak ne’e, komesa hanorin no dedika nia an durante tinan sanulu (10) sai manorin iha Eskola Primária Maluro, Suku Lore, Postu Administrativu Lore-Lautem.

“Hanoin fali ha’u nia estudo seidauk finaliza, kontinua fali  hau nia estudo iha universidade maibe ha’u fahe tempu mos hodi la husik responsabilidade nudar manorin nain no konsege  hau nia estudu finaliza iha tinan 2008”.

Olan ne’ebé firmi ho nia prinsipiu, matenek no esperiensia sira ne’ebe iha, Nia hetan konfiansa asumi kargo nudar Diretór Eskola iha Ensino Básico Central (EBC) Coro-Asu Maluro iha tinan 2010-2022.

Mane ne’ebé ho nia altura 172 cm, oras ne’e dadaun forma ona familia ho espoza Jolina da Costa Junior,  iha ona aifuan domin hamutuk nain haat (4) kompostu husi feto tolu no mane nain ida .

Iha tinan 2016, Eis diretór EBC Coro-Asu Maluro ne’e sai nu’udar mos Primeiru Vice Prezidente Klibur Profesor no funsionariu edukasaun munisípiu Lautém ( KPFEM-ML)

Olan, manorin ne’ebé ho nia motto “ Bele ki’ak maibé moris ho dignidade” asumi kargu nudar Prezidente Asosiasaun Manorin Nain Munisipiu Lautem iha tinan 2023.

Segundu muda ba minutu, minutu muda ba oras, oras kontinua muda ba loron, husi loron hakat ba fulan no fulan muda tinan, mudansa tinan kontinua la’o, hare husi esperiensia no matenek ne’ebé iha Nia mos hetan konfiansa kaer pasta nudar Diretór Eskola Secundária Geral Lere Anan Timur Lospalos iha tinan 2024

Olan ne’ebé nia favoritu mak iha area futebol no voleiból ne’e iha mehi bo’ot, hamutuk ho konsellu professor sira hakarak lori eskola ESG Lere Anan Timur sai kualidade no priense fasilidade ne’ebé sufisiente nune’e bele asesu ba programa dijitalizasaun iha tempu ensinu de aprendizagem.

Fiar no hein katak ho istoria ka biografia badak husi manorin nain ne’e bele inspira no motiva ita hotu.

*

Hakerek testu : Sudaryatin