Ministériu Edukasaun, liu husi ekipa husi Diresaun Nasional Ensinu Secundáriu Jeral no Ensinu Tékniku Vokasional (ESTV), hala’o visita servisu iha Eskola Secundária Geral Lere Anan Timur (ESG LAT), Lospalos iha kinta-feira (29/01/2026).
Visita servisu ne’e lidera husi Diretór Jerál Ensinu Secundáriu no Ensinu Tékniku Vokasional, Deolindo da Cruz, MPA, ho objetivu atu halo enkontru ho direjente eskola no hare direta situasaun eskola, liuliu kona-ba kolokasaun profesór bolsa kandidatu no limitasaun profesór iha eskola filial Iliomar.
Iha enkontru ne’e, Diretór Jerál ESG no ESTV hateten katak kolokasaun profesór bolsa kandidatu ne’ebé la korespondente ho pedidu eskola sai hanesan desafiú ida. Eskola presiza profesór iha área Siénsia no Teknolojia (CT) ka ezata, maibé kolokasaun profesór Siénsia Sosiál no Umanitária (CSH) barak liu.
“Eskola presiza profesór iha área ezata, maibé profesór sosiál mak barak liu koloka. Lista pedidu ne’ebé eskola entrega ona ami hato’o ba Diretór Nasional parte Secundária no halo koordenasaun ho parte Rekursu Umanu. Ministeriu mos fó kompeténsia ba Diretór Munisipál atu jere fila fali kolokasaun bolsa kandidatu,” Diretór Jerál ne’e hateten.
Nia mos akresenta katak relasiona kona-ba profesór sira ne’ebé hanorin iha nivel secundária ho diploma baxarelatu seidauk hetan orientasaun klaru.
“Tuír lei, profesór ho diploma baxarelatu ne’ebé hanorin iha secundária tenke transfere ba ensino básiku. Maibé dadaun ami seidauk fó orientasaun klaru tanba sei hasoru hela disafiú sira. Ami sei halo análiza atu koloka ka ajusta tanba ne’e bele afeta numeru bolsa kandidatu, liuliu iha ensino tékniku vokasional ne’ebé presiza profesór iha área produtivu,” nia hateten tan.
Diretór ESG LAT Lospalos, Olandino da Costa Belo, apresia visita Diretór Jerál ESG no ESTV ne’e tanba bele ajuda eskola atu hato’o direta problema ne’ebé eskola enfrenta ba nivel nasionál.
“Hau apresia loos visita ne’e tanba bele relata direta ba Ministra Edukasaun no Sekretáriu Estadu ESG no ESTV kona-ba falta profesór iha matéria Siénsia no Teknolojia (CT) ou ezata hanesan Fízika, Kimika, Jeolojia, Ekonomia, no iha área lingua hanesan Temas Literatura no Kultura. Espera katak governu bele foti medidas hodi resolve,” Diretór Eskola hateten.
Durante visita servisu ne’e, Diretór Jerál Ensinu Secundáriu no Ensinu Tékniku Vokasional mos enkoraja profesór sira hotu-hotu iha ESG LAT Lospalos atu kontinua manten kualidade edukasaun, hodi bele garante klasifikasaun di’ak ba estudante sira, ne’ebé eskola ne’e atinji ona no hatudu ba públiku iha nivel Munisipál, Rejionál no Nasional.
*
Hakerek textu : Ekipa ESG. LAT Lospalos
