Estudantes husi ESG. Lere Anan Timur Lospalos, total hamutuk atus ida sanulu resin haat (114), tuir formatura orden unida ka grupu isar bandeira Nasional iha kampu edifisiu Polícia Nasionál Timor-Leste (PNTL) Lautem, kuarta-feira ne’e (12/12/2025), atu prepara sira ba loron komemorasaun Proklamasaun da Independénsia Timor-Leste, ne’ebe sei realiza iha Munisipiu Lautem ba dala 50.
Xefi Polisiamentu Comunitária Munisípiu Lautem, Zezino José da Silva, ne’ebe representante ekipa treinadór munisipiu konaba Orden Unida, hateten katak objetivu treinu ne’e mak prepara estudantes sira atu halo tuir treinamentu ne’ebe importante ba loron komemorasaun 28 de Novembru.
“Estudantes sira sei treinu hodi komprende no halo tuir orden unida. Treinamentu sei hala’o durante semana rua (2) tanba tempu ne’e mak importante hodi prepara sira atu apresenta ho diak iha loron komemorasaun,” inspektor polisia hateten.
Iha fatin hanesan,akompañador estudantes, Agostinho Pinto Lopes, hateten katak ESG. LAT Lospalos mak responsavel ba isar no aerar bandeira ba komemorasaun Loron Proklamasaun da Independénsia RDTL iha Munisipiu Lautem.
“Bazeia despaixu husi komisaun organizadora liu husi Diresaun Edukasaun munisipiu Lautem, eskola ESG. LAT lospalos hetan konfiansa hodi responsabiliza grupu isar no aerar bandeira nasional RDTL ba loron proklamasaun da independênsia RDTL munisipiu Lautem ba dala 50 iha loron 28 Novembru 2025,” nia hateten.
Treinamentu ba seremónia 28 de Novembru ne’e envolve hamutuk atus ida sanulu resin haat (114) estudantes, kompostu husi pelotaun 75, pelotaun 28 no seksaun ida 11, ne’ebe responsavel ba isar no aerar bandeira nasional RDTL, tuir orden no regra husi seremónia ofisiál.
*
Hakerek Textu : Ekipa LAT Lospalos
