Ezame nasionál periodo 2025 ne’ebé realiza hahu husi loron 20 to’o 23 fulan Outobru finaliza ona. Estudante finalista eskola secundária ESG. Lere Anan Timur Lospalos agradese tanba ezame nasionál ba loron ikus iha quinta feira ne’e ( 23/10/2025 ) finaliza ho di’ak.
Diretór eskola ESG. LAT Lospalos Olandino da Costa Belo agradese katak, ezame nasionál ba tinan ida ne’e bele la’o ho susesu, maske pontus ezame nasionál balun la koresponde ho matriz.
“ Ezame nasionál iha eskola ESG. LAT Lospalos ne’ebé, realiza loron haat nia laran hahú husi segunda to’o kinta feira ne’e, la’o kontroladu maske iha failansu tekniku hanesan pontus balun la koresponde ho matriz , perguntas repetidu, resposta la iha, no pergunta ne’ebé foti husi konteudu fora husi manual do Aluno “, nia hateten.
Nia afirma katak, persija hare fila fali konaba matriz ne’ebé Ministériu Edukasaun distribui no tempo distribuisaun dadus finalista husi nasionál ba eskola.
“ Matriz ne’ebé Ministériu Edukasaun envia tenke mai diresaun molok tama ba terseiru períodu nian, nune’e professor da dixiplina iha tempo hodi bele halo revisaun tuir matriz ne’e, pontos ezame tenke representa kada konteudu ne’ebé mensiona iha matriz no konaba dadus estudante finalista barak falla iha naran no data moris, ho ne’e eskola relata dadus ne’ebé loos no envia ba nasionál, maibe tanba kestaun tempu seidauk iha resposta to’o ezame nasionál realiza”, diretur subliña.
Sorin seluk, manorin nain ba dixiplina Português David Barreto informa katak, iha pontus balun mak falla no iha pergunta balun fora husi Manual do Aluno.
“ Ami deskobre ona pontus balun ne’ebé falla no pontus balun ne’ebé mensiona iha matriz maibe la eziste iha manual do Aluno, nune’e ami la halo revisaun ho diak ba konteudu ne’e,” nia informa.
Iha fatin ne’ebé hanesan, Manorin nain materia Matemática Sudaryatin hateten, pontu sira ezame nasionál ba dixiplina Matemática kuaze fasil hotu maske persentagen pontu sira ba kada konteudu la iha balansu.
“ Pontus ne’ebé sai iha ezame nasionál ba tinan ida ne’e, ha’u hare fasil hotu, maske iha konteudu barak mak mensiona iha matriz maibe la sai iha Ezame nasionál tanba iha repetisaun pergunta ba konteudu ida, no mos la iha balansu ba persentagem elaborasaun pontus, liu-liu konteudu ba 120 ano nian ne’ebé, foti barak liu husi materi ba terseiru períodu nian, husi 20 pontus ne’e, eziste 13 pontus foti husi konteudu terseiru períodu nian”,nia dehan.
Aliende ne’e, bazeia orientasaun husi nasionál dadus ba finalista ne’ebé falla, priense tuir dadus ne’ebé eskola muda ona no parte eskola sei relata ba nasionál konaba pontus ne’ebé falla ne’e, nune’e ekipa verifikasaun nasionál bele hare molok halo korresaun.
Entretantu maske finalista sira finaliza ona sira nia Ezame nasional iha loron quinta feira ne’e, maibe finalista sira sei iha tan Ezame lokal ne’ebé, sei monu iha loron sesta feira to’o segunda feira semana oin.
*
Hakerek textu : Ekipa LAT Lospalos
