Estudante sira husi Eskola Sekundária Geral (ESG) Lere Anan Timur, iha Lospalos, selebra Loron Veteranus ba dala 9 ho laran kontente no espiritu patriotizmu aas iha Tersa-feira (03/03/2026).
Selebrasaun ne’e hala’o ho objetivu atu hanoin no fó respeitu ba luta no sakrifísiu herói sira ne’ebé fó an atu realiza ukun-rasik-an ba Timor-Leste.
Programa selebrasaun hahú ho serimónia isar bandeira ofisiál iha área eskola nian. Inspetór serimónia, diretór sesante ESG Lere Anan Timur Lospalos, Selestino Soares, L.Ed, iha nia diskursu hato’o respeitu boot no agradese ba veteranu sira.
“Primeiru hau hato’o respeitu boot no agradese ba veteranu sira ne’ebé luta ho korajen no sakrifísiu atu defende ita-nia rai Timor. Tanba luta no sakrifísiu veteranu sira, ohin loron ita bele moris iha rai livre, ita bele estuda ho dame no harii futuru di’ak liu ba ita-nia nasaun,” dehan inspetór serimónia.
Iha oportunidade ne’e, diretór sesante mos apela ba estudante sira atu respeita no valoriza história luta povu Timor-Leste nian.
“Hau husu ba estudante sira atu respeita no valoriza história luta povu nian. Ita tenki aprende di’ak, estuda ho seriedade no prepara an atu sai lider sira iha futuru, atu kontinua dezenvolve nasaun ida ne’e,” dehan nia.
Depois serimónia isar bandeira, eskola hamutuk ho komunidade lokal realiza misa selebrasaun atu rezá ba alma herói sira ne’ebé mate iha luta ba independénsia Timor-Leste. Iha omilia, padre hato’o mensajen ba juventude sira atu kontinua valoriza no respeita sakrifísiu herói sira, hodi hametin espiritu unidade nasional, dame no solidariedade entre povu. Nia mos subliña katak gerasaun foun iha papel importante atu preserva memória história luta libertasaun no kontribui ativamente ba dezenvolvimentu sustentavel nasaun nian.
Atividade ikus mak vizita ba Cemitériu Herói sira iha Tcaivaca, Lospalos. Iha fatin ne’ebá, estudante sira hamutuk ho profesór, autoridade lokal no komunidade halo serimónia ki’ik no tau ai-funan iha túmulu herói sira hanesan sinal respeitu no gratidaun ba sakrifísiu sira.
*
Hakerek textu : Ekipa ESG. LAT Lospalos
