Segunda feira ne’e nu’udar loron dahuluk ba estudante finalista sira iha teritóriu nasionál espesialmente munisípiu Lautem, iha Eskola Secundária Geral (ESG) Lere Anan Timur Lospalos, ne’ebe prosesu ezame nasionál la’o kontroladu.
Diretór ESG Lere Anan Timur Lospalos Olandino da Costa Belo, L.Ap. relata prosesu ezame nasionál iha ESG Lere Anan Timur Lospalos la’o diak no tuir regras Ministériu Edukasaun nian.
” ESG LAT Lospalos hahu ezame nasionál ho pontus ezame ami simu iha Sabadu no matriz molok ezame nasionál seidauk realiza ami simu ona iha fulan Setembru nia laran ne’ebé ohin loron dahuluk, tuir ami nia observasaun haleu sala de ezame hamutuk 14, la iha difikuldade konaba pontus de ezame nian tamba estudantes sira la kestiona konaba pontus ne’ebe ohin sira hetan ona iha ezame nasional, “ nia relata.
Iha tempo ne’ebé hanesan, Representante Ministeriu Edukasaun liu husi Gabinete Diresaun Geral do Ensino Secundáriu (GDG-ES) Olavio Miranda hala’o mos monitorizasaun ba lala’ok ezame nasionál ba loron dahuluk nian.
Olavio Miranda hateten objetivu husi monitirzasaun ne’e atu hare direita prosesu ijame nasional No. hare preparasaun sala ijame nian .
“ Ami mai atu halo monitorizasaun konaba sala ezame ne’e organiza tuir matadalan Exame Nacional nian ka lae, meza no kadeira sira tau ho loloos, materiál Exame Nacional nian iha kondisaun seguru no konfidensiál no materiál Exame Nacional nian disponivel ba estudante hotu-hotu ka lae, “ nia hateten.
Nia mos hatutan ezame nasionál tenke la’o tuir tempo ne’ebé estabelese ona no vizilante sira tenke kumpri regulamentu vizilante nian.
“ Vizilante sira tenke kumpri oras hahú no remata, konfidensialidade no integridade husi evidénsia ne’ebé aseguradu no laiha intervensaun direta iha sala ezame,” tenik nia.
Tuir dadus finalista husi ESG Lere Anan Timur Lospalos hamutuk estudantes nain 259 kompostu husi programa Ciências Tecnologias (CT) no Ciências Sociais e Humanidades (CSH) ne’ebé total finalista mak presente iha loron dahuluk iha primeira parte mak estudante nain 258, depois de segunda parte, estudante nain 1 hetan moras nune’e finalista mak presente hamutuk nain 257.
Entretantu materia ba ezame nasionál ba Ensinu Secundáriu Jeral Lere Anan Timur Lospalos hamutuk materia 7 ba programa Ciências Tecnologias (CT) no Ciências Sociais e Humanidades (CSH ) hamutuk 7 no ezame lokál hamutuk 5 ba CT no CSH, enkuanto ba ijame loron primeiru nian materia Matemática ba programa CT no materia Economia e Métodos Quantitativos ba programa CSH depois ba segunda ora mak materia jeral Inglés.
*
Hakerek textu : Ekipa LAT Lospalos
