Fundasaun Seraphine (FS) liu husi apoiu Kongregasaun Madre AMAL KASIH DARAH MULIA (ADM), hala’o sosializasaun konaba formasaun “PENDIDIKAN KETRAMPILAN PUTRI” (PKP) iha escola Secundária Geral Lere Anan Timur Lospalos sexta feira ne’e ( 26 / 09 / 2025 ).
Jestor Programa Fundasaun Seraphine Elito da Costa informa, objetivu husi sosializaun ne’e atu fó informasaun ba estudante liu-liu estudante finalista feto sira konaba kursu ka formasaun wainhira la kontinua estudu iha universidade maibe bele ona kria servisu ba an rasik
“ Formasaun ne’e ho objetivu atu hakbi’it feto foinsa’e sira, liu-liu ba sira ne’ebé la eskola, kakotu eskola husi kualker nível (Eskola primária, pre-sekundária no sekundária inklui sira ne’ebé la kontinua ba universidade, maibe sira hakarak buka osan rasik ho independentimente”, dehan Elito da Costa.
Jestor Programa ne’e hateten Formasaun “Pendidikan Ketrampilan Putri” ne’e hanesan formasaun ida ne’ebé ninia kualidade hanesan ho sentru formasaun seluk no baratu kuandu kompara tuir formasaun iha Dili.
“ Formasaun Pendidikan Ketrampilan Putri” (PKP) Seraphine hetan akriditasaun ona husi Governu no servisu hamutuk ho INDMO (Instituto Nacional de Desenvolvimento de Mão de Obra) ne’ebé ninia programa equivalente ho sentru formasaun iha Timor Leste”,tenik Nia.
Fatin hanesan Diretur eskola ESG. Lere Anan Timur, Olandino da Costa Belo, L.Ap. apresia ba atividade ne’e tanba bele fó oportunidade ba foinsa’e sira liu-liu estudante feto sira atu bele hetan esperiensia no abilidade foun.
“Sosializasaun ne’e importante tebes atu fó motivasaun ba estudante liu-liu estudante finalista feto sira , ne’ebé la kontinua sira nia estudu iha universidade maibe hakarak kontinua aprende no dezenvolve an rasik”, nia hateten.
Entretantu formasaun ne’e sei hala’o durante tinan ida, kursu intensivu iha asrama durante fulan hitu (7), hala’o mos estajiu durante fulan rua (2), no fulan 1 prepara ba graduasun.
Materia formasaun maka hanesan kursu Administrasaun Jeral Serttikadu I, Inglês Báziku, IT Hardware, Public Speaking, Kustura, Tein hahan Lokal no Portu nian, produs Tahu -Tempe no seluk tan.
Ba formandu sira tenki prepara osan ho montante atus rua tolunulu resin rua ($ 232) dollar Amerikanu hodi atende ba nesesidade formasaun nian kompostu husi han, toba fatin, farda no sasan ne’ebé sira persija durante formasaun.
Fondasaun Seraphine mos servisu hamutuk ho NGO Lokal no Instituisaun públiku ne’ebé iha munisípiu Lautém hodi koloka formandu sira ba fatin ne’e wanhira tama ona iha faze estajiu.
Formasaun sei hahu registu iha loron 1 fulan novembru no sei taka iha dia 31 fulan dezembru 2025.
*
Hakerek Testu : Ekipa ESG. LAT LOSPALOS
Paraben’s ba ekipa formasaun ka kursu husi ADM ba finalistas Feto Iha ESGP LAT de Lospalos wainhira remata Escola karik la kontinua Iha Universitariu/la kontinua estudo
Obgd