ISTORIA ESKOLA "LERE ANAN TIMUR"

- TEMPU OKUPASAUN
Eskola ida-ne'e hanaran Sekolah Menengah UMUM No. 1 Lospalos. Lokaliza iha aldeia Puihoro. Agora dadaun sai hanesan fatin atual Eskola Sekundária Jerál Nino Conis Santana Lospalos nian.

- TEMPU TRANZISAUN (UNTAET)
Hafoin referendu, eskola ne’e reativa iha loron 28 fulan Outubru tinan 1999 nu’udar Eskola Sekundária No. 1 Lospalos nian. Ida-ne'e lokaliza iha Aldeia Sentrál. Agora dadaun sai hanesan fatin ba EBC Centro Lospalos.

- TEMPU INDEPENDENSIA (RDTL)
Hahú husi 1º Governu to’o 3º Governu, eskola ne’e kontinua hanesan Eskola Sekundária No. 1 Lospalos nian. Ida-ne'e lokaliza iha Aldeia Sentrál. Agora daudaun maka EBC Centro. Iha IV Governu, tuir planu agrupamentu iha nivel ESG, eskola ne’e taka no agrupa ho ESG Nino Conis Santana de Lospalos iha inisiu tinan eskolár 2011 nian. Durante tinan rua (períodu 2011-2012) eskola ida-ne’e eliminadu hosi lista ESG iha nivel nasionál.

Iha V Governu kansela tiha planu agrupamentu eskola sekundária jerál sira no ba dala rua Eskola Sekundária Jerál No. 1 Lospalos reativa hosi S. Exa. Vise Ministru Ensinu Sekundáriu ho naran hanesan maibé iha fatin ne’ebé diferente. Iha momentu ne’ebá deside atu reativa hikas eskola ne’e iha aldeia Kuluhun ka EBC Kuluhun. Ofisialmente eskola ne’e kontinua nia funsaun iha loron 4 fulan Abril tinan 2013 laiha edifísiu rasik.

Iha loron 9 Novembru 2015, Eskola Sekundária Jerál No. 1 Lospalos nia naran muda ba “Eskola Sekundária Jerál Lere Anan Timur Lospalos”. Serimónia tomada pose ne’e lidera husi Vice Ministru Pre-Eskolár no Ensinu Báziku no Xefe Estadu Maior F-FDTL, Majór Jenerál Lere Anan Timur.

Oras ne’e daudaun, “Eskola Sekundária Jerál Lere Anan Timur Lospalos” hala’o hela operasaun ho edifísiu foun rua rasik iha fatin atuál.