Ezame nasionál periodo 2025 ba loron datoluk iha Eskola Secundário Geral (ESG) Lere Anan Timur Losplaos la’o diak no hakmatek hahú husi segunda feira to’o kuarta-feira ne’e (22/10/2025).
Iha ezame nasionál ba loron datoluk ne’e, ESG. LAT hetan vizita husi reprezentante Ministeriu Edukasaun liu husi Gabinete de Avaliação e Dezenvolvimento Curricular e Recursos Pedagógicos (GDACRP) Vanezio F. Ambrozio ne’e hateten objetivu husi vizita eskola ESG. LAT ne’e atu halo monitorizasaun konaba lala’ok ezame nasionál.
“Ami mai atu halo observasaun no kontrola deit katak prosesu ezame nasionál iha eskola ESG.LAT ne’e la’o ho diak, sei rekolha dadus finalista ne’ebé la tuir ezame nasionál, estudante finalista defisiente no repetente, ita hatene uluk sira nia razaun tanba sa mak la tuir ezame nasionál para tau sira ba segunda chamada no fó importansia ba defisiente sira no ba finalista repetente tinan kotuk nafatin fó opurtunidade tuir ezame nasionál no sei tetu hamutuk iha nasionál”, nia hateten.
Iha tempo hanesan, diretór eskola ESG. Lere Anan Timur Lospalos Olandino da Costa Belo kestiona konaba dadus ne’ebé erru no pontu sira ezame ne’ebé la koresponde ho matriz ezame nasionál.
“Dados finalista erru ne’ebé ami relata ona ne’e la iha resposta to’o ezame nasionál realiza no mos matriz ne’e bele distribui mai eskola liu diresaun molok tama terseiru períodu nian, pontus ezame ne’ebé la koresponde ho matriz ezame nasionál no pontus balun ne’ebé falla nu’une halo konfusaun ba estudante atu responde wainhira atu hili opsaun,ami sei aponta hotu no manda ba nasionál atu nu’une ekipa verifikasaun nasionál bele hare molok halo korresaun”, afirma koordenador ezame nasionál.
Entretantu, iha loron datoluk ne’e, estudante finalista sira hala’o ezame matéria Biologia no Fisica ba programa Ciências Tecnologias (CT) no matéria Sociologia no Geografia ba programa Ciências Sociais e Humanidades (CSH).
Husi total finalista hamutuk ema nain 259 kompustu husi finalista programa CT ema nain 183 no finalista programa CSH hamutuk 76, finalista husi programa CSH nain 1 mak la tuir ezame ba loron datoluk ne’e tanba kondisaun saúde la permite.
*
Hekerek textu : Ekipa LAT Lospalos
