Ministério do Ensino Superior, Ciência e Cultura (MESCC) liu husi Diresaun Nasionál Ensinu Superior (DNES) ne’ebé servisu hamutuk ho Universidade Nacional Timor Lorosa’e (UNTL) no Instituto Politctico de Betano (IPB) hala’o semináriu diseminasaun informasaun ba eskola sekundária públiku jerál no eskola teknika vokasionál iha salaun Edukasaun Munisipiu Lautém sexta feira ne’e (19/09/2025 ).
Representante husi MESSC, Diretora Amelia da Silva Araujo, hateten diseminasaun informasaun ne’e hanesan dalan ita atu oferese ba estudante finalista sira oinsa atu asesu ba ensinu superior públiku hanesan UNTL no IPB tinan akadémiku 2026.
Amelia da Silva informa MESCC sei implementa nafatin rejime rua maka hanesan rejime jerál no rejima espesiál ba estudante sira ne’ebé atu asesu ba ensino superior públiku sira.
“ Diploma Ministerial N.º 20/2025 de 09 de Julho Artigo 14.° Sub-rejime espesiál mak Ministériu Ensinu Superió Siénsia no Kultura liu husi Komisaun Asesu Ensinu Superiór Públiku ba tinan akadémiku 2026 hahú hala’o rejistu ba kandidatu ba rejime espesial ho nia sub-rejime mak hanesan tuir mai, Rejime jeral ba estudante ne’ebe remata iha tinan 2025 no estudante Mellor klasifikadu hamutuk neen nulu-resin neen (66), Rejime espesial aplika ba kandidatu ne’ebe iha kriteria tuir mai, remata iha tinan 4 ba kotuk (2021-2024 ), Veteranu, Veteranu nia oan no Mártir nian oan , Familia kbi’it laek, kandidatu sira ho defisiénsia fízika no sensorial komprovadu tiha ona, pratikante desportista , remata Ensinu Sekundáriu iha rai-liur, Sidadaun sira estranjeiru ne’ebé remata tiha ona ensinu sekundáriu , Diplomata (Timor oan sira-ne’ebé hala’o misaun iha rai-liur ka Timor-Leste) no ninia família, Ofisiál sira husi kuadru permanente FALINTIL – Forças de Defesa de Timor-Leste (F-FDTL) no Polícia Nacional de Timor-Leste (PNTL), idade 23 ba leten maske la remata ensinu sekundáriu no Kandidatu atu asesu ba IPB hare husi nia residensia,eskola tenke fó karta rekomendasaun ba estudante ne’ebe idade 23 anos maske la remata ensinu sekundáriu maibe hakarak kontinua nia estudu iha ensinu superior “, dehan Amelia.
Nia hatutan Komisaun Asesu Ensinu Superió Públiku tinan 2025 servisu hamutuk ho Universidade Nasionál Timor Lorosa’e (UNTL) no Institutu Politékniku Betano (IPB), hahú simu estudante foun husi rejime espesiál ho nia sub-rejime espesiál hamutuk sanulu resin neen (16) hahú husi loron 27 to’o 31 fulan Outubru tinan 2025 iha resintu Edukasaun Munisipál no fatin destinadu sira seluk tuir nia sub rejime espesial.
Iha fatin hanesan diretur eskola ESG Lere Anan Timur Lospalos, Olandino da Costa Belo, L.Ap. apresia tebes ho diseminasaun konaba prosesu asesu ensinu superior públiku UNTL no IPB ne’e no bele hatutan informasaun ne’e ba estudante finalista sira, nune’e sira bele hatene kriteriu oinsa atu bele asesu , bele hili departamentu tuir ida-idak nia abilidade no tuir data inksrisaun ne’ebé determina.
Partisipante iha diseminasaun ne’e mai husi Prezidente Autoridade Munisipál, Prezidente Konsellu Kombatente Libertasaun Nasionál Munisipál, Administradór/a Postu, xefe suku sira, Diretór Sentru Solidariedade Munisipál, Diretor/a Servisu Edukasaun Munisipál, Diretór/a Eskola Sekundária Jerál no Eskola Tékniku Vokasionál no Adjuntu Diretor sira hotu.
*
Hakerek textu : Ekipa ESG. LAT LOSPALOS
