Ministériu Edukasaun (ME), liu husi Diresaun Nasional Ensinu Sekundária Geral (DNESG), servisu hamutuk ho kompaña Harii Wai Unipessoal, Lda., fó apoiu ekipamentu dijitál, hanesan komputadór unidade 8 no projetór unidade 8, ba Eskola Lere Anan Timur Lospalos, iha Kuinta‑feira ne’e (15/01/2026).
Parte tékniku husi kompaña Harii Wai Unipessoal, Lda., Bendito Bestias, hateten katak sira sei instala projetór no komputadór tuir lista ne’ebé ME fó ba sira nia kompaña.
“Ami husi kompaña Harii Wai Unipessoal, Lda., servisu hamutuk ho Estadu, monta projetór no komputadór iha parte leste, tuir lista ne’ebé ami simu. Iha Eskola Lere Anan Timur Lospalos, ami monta projetór no komputadór hamutuk unidade 8. Ami koko halo moris ona, no projetór ho komputadór ne’ebé ami instala ne’e iha kondisaun di’ak hotu,” parte tékniku ne’e hateten.
Diretór Eskola Lere Anan Timur (LAT) Lospalos Olandino da Costa Belo, agradese apoiu ekipamentu dijitál ne’e, ajuda ba profesór no estudante sira iha tempu prosesu aprendizajen.
“Ami agradese ba ME liu husi DNESG ne’ebé fó apoiu ekipamentu ICT nian, ne’ebé bele suporta manorin no kanorin sira iha tempu ensinu‑aprendizajen. Ami espera bele uza tuir planu ME nian iha era dijitalizasaun ba mundu global, atu bele hasa’e kualidade hanorin iha sala aula,” diretór eskola LAT hateten.
Responsável máximu Eskola LAT Lospalos ne’e apela ba manorin sira atu kontinua halo kapasita‑an, liu‑liu iha área ICT.
“Ami husu ba manorin nain sira atu kontinua halo kapasita‑an ba implementasaun programa ICT, tanba programa ne’e tuir planu ME hanesan kompeténsia dalima husi kompeténsia haat ne’ebé ita iha ona, tuir Lei Baze Edukasaun nian,” nia apela.
Entretantu, sala aula ne’ebé instala ona projetór no komputadór hamutuk sala 8. Sala sira ne’e iha kondisaun seguru tanba janela sira asegura ho tralis.
*
Hakerek textu : Ekipa LAT Lospalos
