Ministériu Edukasaun (ME) liu husi Diresaun Nasionál Edukasaun Inklusivu no Asaun Sosial Eskolar (DNEIASE) hala’o atividade sensibilizasaun kona-ba igualdade jéneru no saúde reprodutivu ba estudante ESG. Lere Anan Timur Lospalos iha sexta feira ne’e ( 13/03/2026 ).
Representate husi DNEIASE , Adelina Ximenes, hateten objetivu husi sensibilizasaun ne’e atu hasa’e koñesimentu estudante sira kona-ba importánsia respeitu ba igualdade entre mane no feto
“ Ami mai atu espalha ami nia esperiensa konaba igualdade jéneru nu’une estudante sira bele hatene diferensia entre sexo no jéneru , labele halo diskriminasaun entre feto no mane no hotu – hotu iha direitu ne’ebe hanesan,” representante DNEIASE ne’e hateten.
Nia mos aumenta, ami fahe informasaun konaba saúde reprodutivo ne’e para estudante sira bele kompriende di’ak saida mak saúde reprodutivu nu’une sira bele prevene problema sosial no saúde iha futuru.
“ Konaba saúde reprodutivu ami hare konaba isin lolon, ita hatene katak estudante sekundária pertense ba idade produtivu, nu ’une ami fahe informasaun ne’e atu prevene problema sosial no saúde para sira labele halo buat ne’ebe arbiru, labele kawin sedu no sira fokus deit ba sira nia estudu,” tenik nia.
Iha abertura sensibilizasaun ne’e, diretór eskola ESG. LAT Lospalos, Olandino da Costa, hato’o agradese ba ekipa DNEIASE no husu ba estudante sira para partisipa ho diak, rona no aprende buat barak husi materi ne’ebe sei hatoo husi fasilitador sira.
“ Primeiru hau hakarak hato’o agradese ba ekipa husi DNEIASE ne’ebé mai halo atividade sensibilizasaun iha ami nia eskola , programa ida ne’e importante atu fó koñesimentu ba estudante sira kona-ba igualdade jéneru no saúde reprodutivu. Nu’une sira bele kompriende katak mane no feto iha direitu hanesan, ita hotu bele respeita malu, ajuda malu no kria ambiente eskola ne’ebé seguru no di’ak ba ema hotu no husu mos ba estudante sira para partisipa ho diak ,rona no aprende buat barak husi materi ne’ebe sei hato’o husi fasilitador sira,“ diretór eskola hateten.
Iha atividade ne’e, fasilitador husi DNEIASE esplika ba estudante sira kona-ba direitu ema hotu-hotu, igualdade oportunidade ba mane no feto no responsabilidade atu proteje saúde an rasik. Estudante sira mos simu informasaun kona-ba maneira atu evita violénsia seksuál, abuzu seksuál no problema sira seluk ne’ebé bele akontese iha komunidade.
Total estudante ne’ebe partisipa iha sensibilizasaun ne’e hamutuk ema nain atus ida lima nulu (150) kompostu husi estudante mane no feto.
*
Hakerek textu : Ekipa ESG. LAT Lospalos
