Ministeriu Saúde liu husi Diresaun Nasionál Saúde Materno Infantil Departementu Saúde Adolexente e Joven servisu hamutuk ho Ministériu Edukasaun hala’o atividade desiminasaun iha Eskola Sekundária Jeral (ESG) Lere Anan Timur Lospalos kona-ba impaktu mudansa klimátika no importância saúde reprodutiva ba adolexente sira iha tersa feira ne’e ( 24/02/2026 ).
Iha abertura, representante husi Ministériu Saúde (MS) , Xefe Departementu Saúde Adolexente no Joven , dr. Rita Manuela da Costa, hateten katak objetivu husi Diseminasaun material edukasional ne’e atu oferese informasaun jeral kona ba Mudansa klimátiku no Saúde Reproduktiva Adolexente (SRA), inklui anatomia no fisiolojia, no mos topiku inter-ligadu sira hanesan jeneru, nutrisaun no abilidade principal konaba moris ba estudante sira , “ nia hateten.
Nia akresenta katak tópiku Saúde Reprodutiva Adolexente mos sai hanesan fokus prinsipal. Ekipa Ministeriu Saúde fó informasaun kona-ba mudansa fizika no emosional iha tempu puberdade, importante higiene pessoal no oinsá evita risku hanesan gravidez prematura .
Iha fatin hanesan, representante husi Ministeriu Edukasaun, Xefe Departementu Jestaun e Programa Edukasaun Munisipiu Lautém, João Aparicio, informa katak espera aktividade ne’e bele ajuda estudante sira aprende konaba impaktu ambientál , komprende konaba mudansa fisika no emosional iha tempo puberdade no bele fahe tutan informasaun ne’e ba kolega sira seluk ,” Xefe Departementu Jestaun e Programa Edukasaun Munisipiu Lautém ne’e informa.
Diretór eskola ESG. Lere Anan Timur Lospalos, Olandina da Costa Belo, fó bem vindu no agradese ba ekipa husi Ministériu Saúde Nasionál no apela ba estudante sira para bele partisipa ho diak sensibilisasaun ne’e.
“ Agradese ba ekipa MS ne’ebe halo sensibilisasaun iha ESG. LAT Lospalos, espera estudante bele partisipa ho diak, komprende konteudu sira ne’e nu’udar bukae no kuñesimentu jeral no siensia foun iha sira nia moris no sira bele adapta an wainhira situasaun mosu iha sira nia leet , “ diretór eskola hateten.
Entretantu aktividade sensibilizasaun ne’e hetan partisipasaun diak husi estudante hamutuk ema nain neen nulu resin haat (64) kompostu husi estudante ESG. LAT Lospalos ema nain tolu nulu resi rua (32) no estudante husi EBC. Kuluhun Lospalos ema nain tolu nulu resin rua (32) no professor akompanhantes hamutuk ema nain haat (4).
*
Hakerek textu : Ekipa ESG. LAT Lospalos
