SUSESU MAI HUSI EMA NE’EBE SEMPRE KOKO NO LA TAUK ATU FALLA

“ Oportunidade nunka hotu la presija atu sai ema  susesu kedas iha tempu ne’eba, susesu la’os hare ba ema  manan maibe susesu hare ba ema  sempre koko no la tauk atu falha”.

Blandina Rowai Soares , hanesan fitun nabilan ida  sempre fó naroman ba ema  besik nia, moris iha Ponta Leste, espésialmente Lospalos iha loron 02 fulan Junho tinan 2007.

Aifunan domin husi aman naran Selestino Soares ho inan Cristina Fernandes, agora dadauk hanesan estudante iha eskola ESG. Lere Anan Timur Lospalos.

 Jeni mak biasa nia kolega sira bolu nia,  joven ne’ebé husi Serelau ne’e iha mehi hakarak dedika nia an atu tulun ema liu husi Médico. Mehi  furak tebes sai hanesan “ lutadór umanitáriu “ sai naroman iha tempo nakukun ba ema ne’ebé persija nia tulun.

Jeni  moris husi familia  simples  no tau  importansia ba edukasaun , aprende iha uma hala’o ona desde nia seidauk eskola, maun no bin ho pasiensia hanorin konaba alfabetu.

Nudar manorin ida, Jeni nia aman iha esperansa bo’ot atu iha futuru bele susesu no sai ema ne’ebé bele fó benefisiu ba ema seluk, respeita ema seluk liu-liu inan-aman no tane as fiar nudar ema sarani.

Jeni mak oan dahaat husi maun alin nain lima (5) ne’e hahú nia estudu iha ensinu Pré-primária iha tinan 2012 iha eskola Pré-eskolar ICATUTUN, Jeni ki’ik ne’ebé ativu no badinas gosta aprende buat ne’ebé foun.

Nia sente kontente tamba buat ne’ebé profesora hanorin nia aprende ona iha uma.

Jeni kii’k ne’ebé sempre alegria, aproveita diak tempo hodi aprende buat barak hanesan kanta, dansa no seluk tan.

Tempo lao dadaun, labarik kiik ne’ebé nia tipe hakarak hatene buat barak ne’e, ho vontade rasik no hetan suporta husi familia kontinua nia estudu iha ensino Primária iha Ensino Básico Filial (EBF) No. 3 de Lospalos no finaliza iha tinan 2019.

“ Waihira ha’u kontinua ha’u nia estudu iha primaria , ha’u sente moe atu espresa ha’u nia an ba kolega sira tanba ne’e hanesan ambiente ne’e foun mai ha’u, mas nu’une ha’u nafatin koko atu bele adapta  no  hatudu prestasaun diak atu nu’une halo mestre sira kontente”.

 Durante eskola iha primária, Jeni tuir atividade barak hanesan sai cheerleader atu simu bainaka husi japaun no seluk tan, maske nune’e nia mantein hetan klasifikasaun diak iha ninia turma to’o remata.

Luta naruk durante tinan 6 iha eskola primária, Jeni ne’ebé gosta kanta no rona muzika ne’e hakarak haklean nia abilidade, nu’une nia hili eskola EBC Lulira  Lospalos ne’ebé atualmende muda naran ba EBC Martires da Patria Ira Ara sai fatin aprende no remata iha tinan 2022.

Agradese boot ba Maromak tam ba Jeni moris iha familia ne’ebé sempre fó suporta ba nia estudu, nune’e nia mestre sira sempre tau konfiansa ba nia. Pela primeira vez  nia  ho kolega na’in rua tuir kompetisaun Certame no konsege hetan rezultadu pozitivu.

 “Orgullu tebes tamba bele sai vensedor ba Certame refere”

Atu fortifika  ninia abilidade, Jeni feto morena ne’ebé gosta tein ne’e kontinua nia estudu iha ensino secundario iha eskola ESG Lere Anan Timur  Lospalos, ho vontade rasik nia hili programa Ciência e Tecnologia iha tinan 2023 to’o agora.

Bainhira hakat ba nivel  sekundária, odamatan opurtunidade  komesa nakloke , Jeni ho fitun Gemini ne’e, konsege tuir kompetisaun barak hanesan Certame nivel lokal, munisipál, Nasionál, diskursu públiku, diskursu nivel eskola no tuir mos kompetisaun kulturál  no ho grasa Maromak nian hotu-hotu hetan rezultadu pozitivu.

Feto ho fuuk been ne’e hamutuk ho nia kolega nain haat (4) hetan tan oportunidade atu tuir konferensia  project for peace  iha Dili durante semana ida. Hafoin Fila husi konferensia, hetan esperiencia husi matenek nain sira no ho nia kolega na’in haat konsege loke duni klube ne’e ho naran ECR of LAT (Eco Rangers of Lere Anan Timur) maske ho fundus ne’ebé ki-ik. Klube ne’e foka liu ba iha area ambiente no liuhusi atividade refere sira konsege kuda ona ai-oan no halo ona lixu fatin husi aqua mamuk.

“ Atividade lubuk ne’e hanorin Ha’u katak bainhira Ita iha hakarak duni, oportunidade sei mai nafatin no halo Ita sai individu ne’ebé diak ba Ita Nia futuru rasik. Xave lolos ha’u nia susesu hotu tamba hetan orasaun husi inan-aman  no suporta husi Maun ,bin no Alin”  .

Ho ninia abilidade rasik Feto “morena”  ne’e mos hola parte iha konsellu estudantil no asume knaar nudar seksaun akademia nian, nia mos hola parte iha atividade ekstra hanesan  koru eskola, formasaun, semináriu, workshop no mos inklina an iha atividade ekstra sport for life no MJS (Movimentu Juvenil Salezianu) .

Jeni, ne’ebé hela iha Central ne’e ,hateten ba maluk sira iha liur ne’eba katak oportunidade nunka hotu nu’une la presija atu sai ema nebe susesu kedas iha tempu ne’eba, susesu la’ós haree ba ema ne’ebé manan maibé susesu haree ba ema ne’ebé sempre koko no la ta’uk atu falla.

Liu husi Jeni nia istória hanorin ita katak esforsu, papel familia importante tebes mai ita, espera ida ne’e bele sai referénsia no inspirasaun ba ema seluk liu-liu estudante sira.

*

Hakerek textu : SUDARYATIN