HUSI MORIS SIMPLES HETAN VALOR DIAK IHA ESKOLA

 “Hau nia naran kompletu Nencio dos Santos Hornay,moris iha lospalos iha data : 16 de Novembru de 2008, oan husi Norberto Hornay no Ermenegilda dos Santos. Hau nu’udar oan datoluk husi maun alin nain haat no agora dadaun ha’u hela iha Kuluhun Lospalos”.

Moris iha familia ne’ebe nakonu ho domin, edukasaun ne’ebé diak, no kariedade ne’ebé makaas,bainhira sei kiik Nencio sempre akompaña nia mae serbisu iha igreja, hanorin nia atu hatene respeita ema seluk.

Hanesan agrikultor, Nia pai servisu makas hodi atende nesesidade uma laran, maibe nudar aman la husik responsalidade hosi akompaña Nencio, hodi la’o halimar iha villa Lospalos atu esplora paizajen cidade nian nune’e bele haforte Nia mentalidade.

Husi membru familia nain 4 kompostu husi feto nain 2 no mane nain 2, Nencio oan ba datoluk nian,  iha ne’ebé nia maun no bin sempre hanorin alfabetu no matematika baziku sira iha uma maske seidauk eskola, husi ne’e mak guia Nia etapa moris to’o ohin loron.

Tempu kontinua la’o, husi segundu ba minutu, minute ba oras, Nia hahu edukasaun formal dahuluk iha pre-eskolar Kuluhun iha tinan 2012 too 2013, Nencio  identíku moedor maibe tanba edukasaun uma laran muda nia mentalidade  hodi halo relasaun diak ho kolega sira hodi aprende no halimar hamutuk, ikus mai konstrui Nencio sai ema ne’ebé fiar an no sai labarik ne’ebe iha kapasidade.

Tempu mos la’o dadaun husik hela ensino Pre-Eskolar kontinua kedas ba Ensino Primaria  EPF 1,2 Kuluhun, husi tinan 2014 too 2019, ho ambiente foun Nencio mos hahú adapta an ho ema barak no amigo foun sira iha eskola, hodi  aprende, halimar no kontente hamutuk.

Mai husi familia ne’ebé simples maibe nia Pai sempre enkoraja atu estuda makaas hodi valor ne’ebé diak, no promete atu fó premiu bainhira hetan klasifikasaun iha eskola maske nune’e Nencio  mos hetan nafatin suporta masimu husi familia wainhira nia hetan valor ne’ebé la diak,ho  promesa no apoiu hirak ne’e maka dudu Nencio esforsu maka’as atu estuda no ikus mai hetan duni valor tuir nia mehi hodi okupa iha primeiru klasifikasaun.

Mundansa ba oras, mudansa ba loron no loron,mudansa mos tinan, husik hela ensino primaria Nencio kontinua buka is foun iha eskola Bázika Centrál  No.3 Lulira iha tinan 2020 to’o 2023 ne’ebé aktualmente muda naran ba EBC Martires De Patria Ira-ara.

Nudar estudante foun sentimentu moe sei hafalun Nnecio, lá’os ne’e de’it espiritu kompetetivu mos komesa mosu tanba estudante barak tebes maka hamutuk ho nia iha eskola ida.

Nakonu ho espiritu fiar an nian, Nencio hetan fiar husi eskola sai nudar xefe da turma hodi delega nia maluk durante prosesu aprendijajen iha aula.

La naton dei’it iha ne’e Nia mos tuir atividade seluk iha eskola no sai mos hanesan konkorente ida iha kompetisaun sertame nivel munisípiu ho nia maluk sira.

ESFORSU MAKAAS SEI LA TRAI NIA RESULTADU,Nencio lori eskola bazika central No.3 Lulira hetan vitoria iha kompetisaun ne’e sai primeiru klasifikasaun.

“ Hau tuir kompetisaun sertame a nivel munisípiu no konsege hetan resultadu ne’ebé maka la espera, konkista seluk ne’ebé mak ha’u hetan mak tama melhores klasifikasaun a nivel nasional ano letivo 2022 no hetan bolsa merito husi Ministériu Edukasaun”.

Funu iha area edukasaun kontinua la’o, ambiente foun la sai bareira ba Nia hodi kontinua estudu iha Eskola Sekundaria Geral Lere Anan Timur iha tinan 2023 to’o agora.

Ho karateristíka ne’ebé laran luak, nia kontinua aprende buat barak husi eskola, alein hetan klasifikasaun husi aula, Nia mos tuir atividade sira hanesan, konselho estudantil no asumi knar hanesan koordenador akademia no mos koru ba missa iha parokia.

Vitoria ne’ebé nia atinji ona iha tempu pasadu la para to’o iha ne’eba, Nia kontinua hetan opurtunidade hodi lori ESG Lere Anan Timur hetan primeiru lugar iha kompetisaun sertame nivel munisipál,nivel regional no nivel  nasionál.

Lá’os ida ne’e de’it abilidade seluk mos subar iha kakutak, Nia mos tuir kompetisaun hakerek kreativu,kompetisaun kulturál no sempre hetan resultadu ne’ebé pozitivu.

“Hau ho kolega nain 4 ami kria klubu ida iha eskola, ami fo naran Eco Rangers hodi proteje ambiente iha ami nia eskola, konvida orador espertu sira, resiklazen ba sasan uzadu, kuda ai-horis  iha eskola no atividade barak ne’ebé ami halo tiha ona no sei halo tan”.

Atividade seluk hosi eskola, Nnecio mos dedika an iha grupo kategoriál sira hanesan Oratorio, Movimentu Juvenil Salesiano (MJS),Acolitos,Sport for Life, nomos hanesan delegadu ba konferensia initiative for peace (IFP 2025), project for peace 2025.

Sai ona hanesan joven ida, tinan 17 ona, Nencio kontinua halo koneksaun ho ema potensiál sira seluk nune’e bele forma sai lideransa ne’ebé iha responsabilidade iha futuru.

Hodi hamaluk nia atividade iha uma, Nnecio mos kontinua kadi nia abilidade seluk hanesan tokador ho instrumento  Guitar no Piano, pasatempu mos iha uma Nia kontinua lee livru no aprende buat ne’ebe interesante ba nia moris.

“Iha futuru hau mehi hakarak sai ema ne’ebé bele fo impaktu positivu ba ha’u nia Aan no mos ema sira ne’ebé iha ha’u nia sorin”.

Susesu la mai ho sorte de’it maibe ho Esforsu, Disiplina no Determinasaun, labele hein tempo ne’ebé mak perfeitu atu hahú, iha prosesu nia laran sei hasoru dezafiu barak, maibe firme nafatin tanba buat furak sei hetan husi ema sira ne’ebe nafatin konsistensia no komprimisiu nafatin ba nia objetivu.

Hakarak muda ita nia moris, komesa agora ho ita nia an ho buat hirak ne’ebe ita iha. Fiar, foti asaun ho disiplina.

*

Hakerek texto : Agostino Pinto Lopes

Editor : Formador JPD SECOMS