JPD – ESG.LAT Lospalos, 21 Maiu 2026 – Sekretária Estadu Komunikasaun Sosial (SEKOMS ) servisu hamutuk ho Child Fund realiza atividade refreshing training ba manorin nain sira hamutuk nain sia, Kinta semana ne’e (21/05) iha Salaun Teknologia Multimedia Eskola Sekundaria Jeral Nino Konis Santana – Lospalos durante loron rua hahu husi loron Kinta feira to’o Sesta feira.
Iha abertura, Xefe Departementu Estudu Promosaun no Dezenvolvimentu Media – SEKOMS, Alberto da Costa Ribeiro, hateten objetivu husi formasaun ne’e husi parte ChildFund sei publika modulu konaba Mantein Seguru iha Online: Aprende, konekta no Proteje ho Swipe Safe ba website eskola nian no husi parte SEKOMS sei halo avalisaun ba website eskola ne’ebe maka kria ona.
“Husi parte ChildFund sei publika modul ba Website eskola nian nune’e estudante bele aprende no bele projete an husi risku plataforma online no media dijital sira. No ami mai atu halo monitorizasaun no avaliasaun konaba progresu WebSite eskola ne’ebe kria ona, no husi eskola lima (5) ne’e só eskola NKS no LAT maka ativu no eskola sira seluk ladun ativu,” nia dehan.
Nia akresenta tuir plano ne’ebe iha, profesór ne’ebe tuir formasaun ne’e sei halao estagiu iha Radio Komunidade Lospalos (RCL) durante semana ida no kontinua halo interkambiu durante loron 3 iha Munisipiu Viqueque.
Iha biban ne’e mos Official Protesaun ba Labarik (OPL), husi Centro Solidaridade Sosial no Inklusaun munisipiu Lautem (CSSI-ML), Augusto Jefriano da Costa, hateten programa “Swipe Safe” sei projete labarik sira husi risku media online.
“Liu husi programa “Swipe Safe” fó edukasaun kona-ba seguransa online no prevene cyberbullying, eksploitasaun online no risku digital seluk. ChildFund dezenvolve programa ida ne’e hodi kria ambiente digital ne’ebé seguru ba labarik sira no papel inan-aman importante tebes atu proteje oan sira husi risku media online sira,” katak OPL ne’e.
Iha fatin hanesan, partisipante husi eskola Sekundária Jerál Lere Anan Timur (LAT) Lospalos, Laurentino Moreira, hato’o agradese ba ekipa no sei kontinua hatutan informasaun hirak ne’e ba estudante sira.
“Agradese ba ekipa SEKOMS no ChildFund ne’ebe realiza formasaun ne’e no informasaun ne’ebe ami hetan ne’e, ami sei fahe tutan no espera ami nia website eskola bele sai media ida hodi fasilita programa Swipe Safe ba estudante sira ,” tenik Nia.
Entretantu iha Refreshing training durante loron rua ne’e, partisipa husi ema nain sia (9) ne’ebe kompostu husi Eskola Sekundária haat (4) iha Losplos maka hanesan eskola ESG. LAT Lospalos, ESG.NKS Lospalos, ESTV no.1 Lospalos no ESTV no. 2 Lospalos. Husi partisipante nain sia ne’e, partisipante rua mai husi eskola LAT Lospalos maka hanesan Sudaryatin no Laurentino Moreira.
*
Hakerek textu : Ekipa ESG. LAT Lospalos
Leave a Reply