ESG-LAT Lospalos ; Agensia CARE Internasional Timor Leste hala’o sosializasaun ba diretór eskola Básica (EBC) , eskola sekundária jerál (ESG) no eskola técnico vokasionál (ESTV ) no pessoal edukasaun konaba revista LAFAEK alinha ho kuríkulum nasionál Timor-Leste no intrega iha prosesu aprendizagem iha sexta feira ne’e ( 08/05/2026) iha salaun Edukasaun munisípiu Lautem.
Senior Project Officer agencia CARE ba rejiaun Oeste , Joanico Correia Marques, hateten objetivu husi aktividade ne’e mak atu intrega revista Lafaek iha prosesu aprendisagem.
“ Ami servisu hamutuk ho Ministériu Edukasaun (ME) atu integra revista Lafaek iha prosesu aprendizagem, tamba konteudu iha revista ne’e alinha ho kurrikulum nasional no bele uza hanesan material suplementar atu ajuda manorin sira no oan sira halo aktividade sientifiku nune’e sira bele komprende lalais, ” dehan Joanico.
Nia akresenta molok revista Lafaek ne’e distribui ba kada eskola, ekipa produsaun revista Lafaek halo diskusaun no mapamentu konteúdu.
“ Kada edisaun revista ne’e sei revisa hamutuk ho ekipa tékniku husi MEJD, INFORDEPE no parseiru sira atu asegura katak materiál sira suporta aprendizajen iha eskola tuir padraun kuríkulum nasionál ,” nia akresenta.
Iha abertura sosializasaun , Superintende Edukasaun Munusipiu Lautem, Ermelinda Pereira, hateten katak atu hasa’e kualidade edukasaun estudante sira persija referensia barak.
“ Atu hasa’e kualidade edukasaun estudante sira persija referensia barak , referensia ida mak Revista Lafaek ne’ebe ajuda tebes ita nia oan sira, iha pre-eskolar no EBC hodi hasa’e literasia, numerasia, metodolojia hanorin no edukasaun komunidade ,” nia hatete.
Nia mos rekomenda katak konteudu istória ne’ebe hakerek iha lia Tetun bele traduz ho lian portugues.
Reprezentante husi eskola Sekundária Jerál Lere Anan Timur (LAT) Lospalos, Sudaryatin, agradese tamba CARE Internasional bele fahe revista Lafaek sai hanesam material ba prosesu aprendizagem.
“ Agradese tamba revista Lafaek sai material suplementar iha prosesu ensinu no aprendizagem no sujere katak konteudu ka materia ne’ebe ami hanorin iha eskundária bele publika hotu iha revista ne’e no sai referensia ba manorin sira,” Sudaryatin dehan.
Revista Lafaek ne’e iha tipu haat, mak hanesan : Lafaek Ki’ik ba Pré-Eskolár no klase 1–2, Lafaek Prima ba klase 3–6 , Lafaek ba Manorin no Lafaek ba Komunidade.
Aktividade ne’e hetan partisipasaun másimu husi ema nain rua nulu resin ualu ( 28) , ne’ebe kompostu husi Diretór ensino Básico, diretor husi ensino sekundário , diretor ensino Tecnico Vokasional no pessoál edukasaun.
*
Hakerek textu : Ekipa ESG. LAT Lospalos
Leave a Reply