ESTUDANTE HUSI ESG. LERE ANAN TIMUR LOSPALOS PRONTU HASORU EZAME NASIONAL 2025

Semana rua tan Ministério Edukasaun sei realiza ezame nasionál tinan 2025 ba estudante finalista ensino sekundária no pre sekundária iha Timor Leste, oras ne’e daudaun estudante finalista iha eskola hotu-hotu halo preparasaun hodi hasoru ezame ne’e, inklui mos estudante sira husi Escola Secundaria Gerál Lere Anan Timur Lospalos.

Trivonia Menenzia Madeira klasse 12⁰ ano/ CT A  hateten, prontu ona atu tuir ezame nasionál ne’ebé mai, nune’e bele hetan valor diak tuir nia hakarak.

 “ Hau estuda materia ezame nasional desde primeiro periodo no kontinua too terseiru periodo, aleinde estuda iha uma, ami kria grupo , estuda hamutuk  bazeia matriz ne’ebé distribui ona iha segudu períodu no resolve notas ezame nasionál  tinan kotuk “, dehan nia iha resintu eskola ESG LAT Lospalos kinta feira (02/10/25) ne’e.

Nia hatutan tan wainhira nia halo exersisiu no iha pontus balun la komprende, nia sei konsulta ba kolega seluk nomos ba profesor disciplina.

Iha fatin hanesan Snaijer Fatima G. Do Rego 12⁰ ano CT/B informa nia rasik mos prepara ona orariu estuda nian kada loron tuir matriz ne’ebé Ministériu Edukasaun distribui ona dezde segundu periodu liu ba.

 “ Hau  kumpri orariu estuda lorloron ne’ebé hau halo ona.  Hau tenke fahe oras para semana ida nia laran bele estuda hotu materia ezame nasionál nian,  Ami mos kria grupo kiik oan ida, hodi resolver pontos ezame nasional tinan kotuk no  sempre konsulta ho kolega seluk ka  professor materia wainhira hau sente la hatene ka la komprende”, tenik nia.

Parte seluk manorin nain materia Fisica Agostinho Pinto Lopes , L.Ed, afirma katak estudante nain rua (2) ne’e badinas no iha votade duni atu estuda nu’une ida ne’e bele  sai  ezemplu ba sira nia kolega seluk.

“ Espera katak sira hetan notas ne’ebé diak iha ezame nasionál, sira bele kuidadu sira nia saúde, fokus ba estuda to’o ezame nasionál ne’e realiza,” nia dehan.

Ho preparasaun ne’ebé diak, apoiu husi inan aman no apoiu husi eskola, Trivonia no Snaijer iha esperansa boot bele hetan klasifikasaun diak iha Ezame Nasionál tinan ida ne’e.

*

Hakerek textu : Ekipa LAT. LOSPALOS