Ajensia Internasionál ChildFund Timor Leste hala’o vizita ba Escola Secundaria Geral (ESG) Lere Anan Timur Lospalos kuinta feira ne’e ( 09/10/2025).
Objetivu husi vizita ne’e mak atu halo monitorizasaun konaba resultadu husi formasaun Jornal Parede Dijitál ba manorin ensinu sekundária sira iha Munisípiu Lautem ne’ebé realiza ona iha fulan Setembru liu bá.
Swipe Safe Project Officer ChildFund Timor Leste, Napoleão Rodrigues Vieira konfirma konaba akompañamentu husi formasaun ne’ebé Sekretaria Estado Komunikasaun Sosiál (SECOMS-Sigla Portugés) servisu hamutuk ho Childfund hala’o iha fulan kotuk ne’e.
“ Ami mai ne’e atu monitor konaba lala’ok Website ne’ebé instala ona no mós obstakulu ne’ebé infrenta ,” informa nia.
Nia mós hatutan tempo badak sei instala aplikasaun Swipe Safe iha komputador eskola no mós sei realiza formasaun ba manorin sira .
“Iha fulan ida ne’e ka fulan oin ekipa husi ChildFund sei mai eskola atu instala aplikasaun Swipe Safe ba komputador eskola nian no atu haklean programa ne’e, ChildFund sei fó formasaun ba manorin sira konaba Seguransa Online ,” nia haktuir.
Manorin ne’ebé tuir ona formasaun ne’e, Sudaryatin hateten Website ne’ebé SECOMS kria ona ne’e la’o ho diak no kontinua públika informasaun eskola nian.
“ Kada semana ami sempre públika informasaun foun iha ami nia website, informasaun sira ne’e hanesan notisia konaba atividade eskola, biografia no opiniaun “ nia dehan.
Sudaryatin haktuir to’o oras seidauk bele hakerek notisia mesak nu’une sempre konsulta ba formador sira.
“ Ami iha difikulade atu hakerek notísia ho diak tamba falta lingua nune’e ami sempre konsulta ho formador sira, “ tenik nia.
Alein de difikuldade iha hakerek informasaun, obstakulu ne’ebé dala barak infrenta mak rede internet ne’ebé la’o la dun diak nune’e difikulta atu públika informasaun no apaga konteudu balun ne’ebé la uza ona.
Manorin sira mos sujere atu SECOMS kontinua apoiu formasaun nune’e bele profunda kuñesimentu hodi bele hatutan ba estudante sira.
*
Hakerek testu : Ekipa LAT Lospalos
