Kada eskola iha teritório tomak halo hela preparasaun hasoru ezame nasionál tinan ne’e, hanesan mos Eskola Secundária Geral (ESG) Lere Anan Timur Lospalos ne’ebé realiza briefing ho manorin sira iha sexta feira ne’e (17/10/2025) iha salaun manorin nian.
Diretór eskola ESG. LAT no nu’udar responsavel ba ezame nasionál Olandino da Costa Belo, L.Ap. hateten, objetivu husi briefing ne’e mak fó orientasaun konaba direitu, dever, regra, tékniku no restrisaun ka limitasaun ba manorin sira ne’ebé iha tempo ezame nasionál nu’udar vizilantes nune’e ezame nasionál bele la’o ho diak no sucessu no ponto importante mak potualidade no disiplina.
“ Iha tempo ezame nasionál ekipa husi munisipál ka nasionál sei mai halo observasaun nune’e husu ba vizilantes sira marka prezensa ona iha eskola molok tuku 07.30 OTL tamba tuir orario ne’ebé estabelese ona tuku 07.45 estudante finalista sira tama ona iha sala de ezame no ezame nasionál sei hahu tuku 08.00 OTL “, nia dehan.
Responsavel ezame nasionál ne’e hatutan ezame nasionál ne’e bele la’o ho diak no susesu depende husi vizilante sira wainhira hala’o vizilansia.
“ Wainhira loke envelope ezame nian, loke ho kuidadu, molok notas ezame fahe verifika nia materia ezame ne’e tuir orario ne’ebé estabelese ona ka lae no iha tempo ezame nasionál la’o husu ba professor vizilante para halo akompañamentu konaba priense dados iha folha resposta estudante nia“, nia haktuir.
Diretur ne’e akresenta katak durante períodu ezame nasionál sei la autoriza manorin vizilante sira atu husu lisensa nune’e mos apela ba verifikador sira atu verifika notas ezame ho diak.
“Iha ezame nasionál nia laran, ami la utoriza para professor vizilante husu lisensa, exeptu relasaun ho saúde ka familia uma laran mak kona dezastre, husu mos ba parte verifikasaun para verifika didiak dados estudante finalista nian baseia dados ne’ebé verifika ona, tau fali folha resposta iha envelope laran tuir orden no grava envelope ho kuidado para folha resposta labele ku’ak liu-liu iha parte pontu sensitivu ne’e, “ nia subliña.
Iha tempo ne’ebé hanesan, Diretór adjuto eskola ESG. LAT Carlito Gonzaga, S.Pd. informa katak, total estudante finalista eskola ESG. Lere Anan Timur Lospalos ne’ebé tuir ezame nasionál mak hamutuk ema nain 259, kompostu husi 183 estudante sira husi programa Ciências Tecnologias (CT) no 76 estudante sira husi programa Ciências Sociais e Humanidades (CSH).
“ Husi finalista hamutuk ema nain 259 ne’e ami persija 14 salas. 10 salas ba programa CT no 4 salas ba programa CSH no kada sala sei koloka vizilante nain 2 kompostu husi professor permanente no professor kontradu,” nia informa.
Ikus liu kolaborasaun diak entre parte eskola, vizilante sira, parte verifikasaun no estudante mak xavi ba susesu ezame nasionál tinan ida ne’e.
*
Hakerek textu : Ekipa LAT Lospalos
