Formasaun ne’e atu aumenta kapasidade manorin sira iha área informasaun komunikasaun no teknologia (ICT), eskola ESG. Lere Anan Timur Lospalos halo formasaun ICT báziku ba manorin nain hitu (7) ne’ebé sira tama ba kategoria kuñesimentu ba ICT no Plataforma online ne’e menus husi 50% iha Quinta feira ne’e (13/11/2025) iha salaun informatika ESG. LAT Lospalos.
Formador Antonio da Costa informa katak, objetivu husi formasaun ne’e atu fó kuñesimentu konaba ICT baziku, oinsa uza komputadór , oinsa atu uza software MS. Word, MS. Excel no Power point relasiona ho prosesu aprendizajen molok sira tuir formasaun ba Plataforma edukativa online nian.
“ Molok hala’o formasaun konaba ICT no Plataforma edukativa oline ne’e, ami halo ona teste diagnostiku ba manorin hamutuk ema nain rua nulu resin sia (29) no manorin nain hitu (7) ne’e sei dauk iha kuñesimentu naton ba ICT bázika, tanba ne’e, sira sei tuir formasaun ICT báziku nian molok sira partisipa iha formasaun plataforma online,” formador ne’e hateten.
Nia akresenta katak aktividade formasaun ne’e hanesan akompañamentu husi programa Ministériu Edukasaun servisu hamutuk ho INFORDEPE no SEAMOLEC, ne’ebé fó formasaun ba manorin sekundáriu konaba “INNOVATIVE TEACHER TRAINING TO EMPOWER CREATIVE AND INTERACTIVE DIGITAL LEARNING” ne’ebé realiza iha fulan kotuk liu ba.
“ Formasaun ICT no plataforma online ne’e hanesan akompañamentu husi formasaun ne’ebe ami nain rua tuir iha fulan kotuk, ami sei hatutan ba ami nia maluk profesores sira, tamba formasaun ne’ebe ami tuir ne’e, sai ami nia traballu Ida ba ami atu hatutan ba kolega sira seluk iha kada eskola no formasaun ne’ebe mak agora ami halo dadauk ne’e sai etapa importante antes de hala’o formasaun plataforma online,” nia akresenta.
Iha fatin hanesan, Diretór eskola ESG. LAT Lospalos, Olandino da Costa Belo, L.Ap. apresia ba Ministeriu Edukasaun tanba bele fó formasaun progrma ICT ba profesor/a sira iha nível sekundáriu iha teritóriu Timor laran tomak .
“ Hau apresia no agradese ba Ministeriu Edukasaun liu husi Diresaun Nasional ESG no ESTV tamba fó oportunidade ba ami nia profesor /a hodi tuir formasaun nune’e sira bele iha kuñesimentu hodi prepara “an” no prepara nia maluk sira seluk bazeia ba konesimentu ne’ebe iha hodi infrenta progrma implementasaun sistema dijitalizasaun iha tempu ensinu aprendizajen iha tinan oin mai, “ diretur hateten.
Diretur hatutan agradese mos ba professor sira tamba iha vontade tuir formasaun ICT báziku.
“ Hau mos apresia no agradese ba profesora Sudaryatin no profesor Antonio da Costa ne’ebé ho inisiativa rasik kopera ho diretiva Eskola hodi fó formasaun ICT báziku ba nia maluk profesor sira seluk no agradese mos ba profesor/a sira tamba sira iha vontade no antusiasmu atu tuir formasaun ICT baziku nian nune’e sira bele prepara “an” hodi kompete ho nia maluk sira nu’udar manorin wainhira aplika sistema dizitalizasaun , “ diretur haktuir.
Formasaun ICT baziku ne’e tuir plano hala’o durante loron lima (5) ne’ebé formador husi manorin ne’ebé antes ne’e tuir ona formasaun uluk iha Dili iha fulan kotuk liu ba, no mos hetan akompañamentu husi manorin Teknolojia Multimédia.
Alende ne’e sei iha kontinuasaun ba formasaun ICT no plataforma edukativa online ne’ebé sei realiza depois de ijame terseiru períodu ne’e remata.
*
Hakerek Textu : Ekipa ESG. LAT Lospalos
Parabéns ba manorin nain sira iha LAT. Kontenti tebes haree novidades katak LAT hahu ona implementa plataforma dijitál iha eskola.
Orgullu tamba ami bele akompaña informasaun LAT husi website ofisiál ne’e.
Profesor/a sira tenki nafatin hasae abilidade dijital iha era modernu ne’e, se lae ita susar atu implementa siensia teknolojia iha ambiente eskola. Parabens ba profesor/a sira hotu ne’ebe sai ona mata-dalan ba alunus sira hotu.
Obgada
Parabens ba kolega professores sira iha ESG LAT, ne’ebe aprende ICT, atu nune’e ita labele ketinggalan kereta alias ketinggalan jaman.
Obgda @Emiliano dos Santos