Eskola Secundária Jeral (ESG) Lere Anan Timur Lospalos halo sorumutu ho inan-aman hodi fahe rezultadu ezame nasional perído 2025 iha Kinta-feira ne’e (18/12/2025).
Rezultadu ezame nasional perído 2025 hatudu katak husi estudantes finalista ESG Lere Anan Timur Lospalos hamutuk atus rua lima nulu resin sia (259), estudante atus rua lima nulu resin tolu (253) mak pasa nu’üne nia persentajem mak 97,7% no ida ne’ebé mak la pasa hamutuk nain 6 ho persentajen 2,3%.
Alende hetan klasifikasaun diak iha nível nasional, eskola ESG LAT Lospalos mos okupa primeiru lugar no segundo lugar iha nível munisipál.
Estudante ho naran Nencio dos Santos Hornay mak okupa primeiro lugar ho total valor 67 no Blandina Rowai Soares mak okupa segundo lugar ho valor 64.
Iha nia diskursu, Diretór ESG LAT Lospalos, Olandino da Costa Belo, LAp., apresia ba rezultadu ne’ebé estudante sira hatudu no apela ba estudante sira no inan-aman para enkoraja no motiva nafatin oan sira.
“Hau apresia tebes ba rezultadu ne’ebé estudante sira hatudu iha ezame nasional perído 2025 nu’üne ita bele okupa terseiru lugar iha nível nasional no apela mos ba oan sira, inan-aman ne’ebé marka presensa ho fuan boot simu rezultadu nu’udar rezultadu esforsu estudante, inan-aman no professor sira, enkoraja no motiva nafatin oan sira ho rezultadu ne’ebe ita sei simu,” Diretór ESG LAT Lospalos hateten.
Diretór eskola akresenta konaba kolokasaun profesores bolsu kandidatu ne’ebé la tuir pedidu no nesesidade eskola.
“Professor kontratadu ne’ebé manan ona ba bolsa kandidatu koloka ba eskola seluk, no ida ne’ebé mai n’e la tuir eskola nia nesesidade, nu’üne sai preukupasaun ba eskola tanba professor dixiplina balun mak la iha,” direjente ne’e akresenta.
Iha fatin hanesan, parte seguransa Xefe Operasaun Polícia Nasional de Timor Leste (PNTL) Municipio Lautem , Palmino da Cruz hateten sei asegura inan-aman ne’ebé marka presensa no rikosoin estadu nian iha eskola.
“Ami nia ekipa sei asegura inan-aman no rikosoin estadu nian iha eskola ne’ebé nia estudante la pasa iha ezame nasional. Ba estudante ne’ebé pasa ka la pasa labele halo barulho, mantein iha situasaun ida ne’ebé hakmatek, labele halo perturbasaun, pinta parede no konvoi ka pawai bazeia sirkular husi Ministériu Edukasaun hasai,” representante PNTL ne’e hateten.
Entretantu, estudante nain neen (6) ne’ebé la pasa ne’e kompostu husi programa Ciências e Tecnologias (CT) nain haat (4) no husi programa Ciências Sociais e Humanidades ema nain rua (2), estudante la pasa tanba nia valor la priense kriteriu hanesan valor 5 mak dala 3.
*
Hakerek textu : Ekipa LAT Lospalos
