Dirijente Eskola ESG Lere Anan Timur (LAT) Lospalos hala’o atividade briefing no fahe tarefa hanorin ba manorin sira, iha Sabadu ne’e (17/01/2026), iha salaun manorin nian.
Iha briefing ne’e, Diretór Eskola ESG LAT Lospalos, Olandino da Costa Belo, L.AP., hateten kona-ba prosesu transferénsia professor sira ne’ebé nia habilitasaun literária mak bacharelatu manten hanorin to’o karta akompañamentu distribui.
“Ba professor sira ne’ebé nia habilitasaun literária mak bacharelatu no nia naran tama ona ba lista transferénsia ne’ebe mensiona iha Jornal da Repúblika , provisoriamente sira sei kontinua hanorin iha ensinu sekundária to’o iha karta akompañamentu husi nasionál kona-ba fahe no distribuisaun tarefa hanorin,” diretór hateten.
Dirijente eskola ne’e mos akresenta kona-ba sistema utilizasaun ekipamentu ICT iha prosesu aprendizagem.
“Ita nia eskola hetan apoio ekipamentu dijitál hanesan projetór no komputadór hamutuk unidade 8. Ami husu ba manorin sira atu tau matan iha tempu hanorin, kontrolu estudante sira atu labele estraga ekipamentu sira ne’e. Ami apela mos ba manorin sira atu partisipa iha formasaun kona-ba ICT nian ne’ebé sei realiza iha Segunda-feira ne’e, tanba tuir orientasaun husi nasionál, domíniu ICT sei tama ba kompeténsia dalima, husi kompeténsia haat ne’ebé iha ona,” dirijente ne’e akresenta.
Iha tempu hanesan, Diretór Adjuntu, Carlito Gonzaga, S.Pd., fahe tarefa hanorin ba manorin sira, ne’ebé balun nia oras hanorin menus no balun seluk nia oras hanorin liu husi padrãun.
“Iha matéria balun ne’ebé seidauk iha professor espesialista, hanesan Fízika, Temas Literatura no Kultura, no Geolojia. Tanba nee, oras hanorin matéria sira ne’e sei fó ba professor Portugués no Biolojia, ne’ebé halo impaktu ba sira nia oras hanorin sai liu husi padrãun. Lista oráriu ne’e ami sei manda ba nasionál no espera iha solusaun lalais ba matéria sira ne’ebé seidauk iha professor,” diretór adjuntu hateten.
Entretantu, total manorin iha ESG LAT Lospalos hamutuk 29, no total turma hamutuk 13, ne’ebé kompostu husi 10° ano turma 4, 11° ano turma 4 no 12° ano turma 5.
*
Hakerek textu : Ekipa LAT Lospalos
