Gabinete Diretiva Eskola Sekundária Geral (ESG) Lere Anan Timur (LAT) Lospalos hala’o enkontru ho Konsellu Professores, pesonal auxiliar administrasaun no seguransa eskola iha kinta-feira (05/02/2026), iha salaun enkontru eskola nian.
Objetivu husi enkontru ne’e mak atu halo avaliasaun jeral ba la’laok ano eskolar 2025, diskute falta professor iha área exata no língua, no mos koalia kona ba problema administrasaun parsial ba ano 2026. Iha enkontru ne’e mós apresenta relatoriu husi Komisaun Organizadora Ijame Periodikal no Ijame Nasional 2025, relatoriu Komisaun Organizadora Simu Alunu Foun 2026, no relatoriu kona ba konsesoes eskolar no kontribuisaun husi inan-aman tinan 2025.
Diretór ESG. LAT Lospalos, Olandino da Costa Belo, L.A.P., hateten katak dezempenhu servisu professor sira presiza hetan atensaun no hadi’a iha ano eskolar 2026.
“Em jeral, problema dezempenhu servisu mak disciplina. Dala barak professor la kumpri oras tama no sai hanorin, la mai hanorin tanba la iha justifikasaun, no fahe kaderneta la tuir kalendáriu nasional. Tanba ne’e, eskola sei buka medida koreksaun konjunta, atu kaderneta bele distribui tuir tempu ne’ebé estabelese ona. Espera katak tama ona ano eskolar 2026, professor sira iha vontade foun atu eduka estudante sira ho diak,” diretór eskola hateten.
Relasaun ho falta professor área exata no língua, responsável máximu eskola ne’e hateten katak dadus kona profesor menus ne’e relata ona ba nível nasional, no eskola sei halo enkontru ho inan-aman atu buka solusaun.
“Aban sei hala’o enkontru ho inan-aman atu koalia kona ba falta professor área exata no língua, no mós problema administrasaun parsial ba 2026, hodi buka solusaun. Espera hetan apoio orsamentu husi inan-aman atu selu professor kontratadu ema nain haat, no mós pesonal administrasaun parsial, seguransa no cleaner hamutuk ema nain neen,” nia akresenta.
Iha oportunidade ne’e, Presidente Komisaun Organizadora Ijame Periodikal 2025, Liliana Meol, hateten katak ijame periodikal tinan 2025 la’o ho di’ak, maski hasoru disafiu oin-oin, hanesan materi hanorin ne’ebé hanesan maibé pontus ijame la hanesan, membru komisaun balu la servisu ho kapasidade máxima, no dadus total estudante entre parte administrasaun no seksaun estudantes la hanesan.
Entretantu, Presidente Komisaun Organizadora Simu Alunu Foun 2026, Arlindo Machado, kestiona kona ba kanselamentu propinas ne’ebé inan-aman aseita ona anteriormente.
“Iha enkontru anterior ho inan-aman, sira aseita fó apoio orsamentu atu atende nesesidade eskola, ne’ebé estudante selu propina $4.00 kada fulan. Maibé iha prosesu inskrisaun ne’ebé la’o hela, propina ne’e kansela la iha karta ofisiál ida,” nia hateten.
Relatoriu kona ba konsesoes eskolar no kontribuisaun inan-aman 2025, Xefi Gabinete Apoiu no Tékniku (GAT), Martinho de Jesus, hateten katak osan ne’ebé simu husi konsesoes eskolar aumenta ho kontribuisaun inan-aman 2025, hamutuk ho restu kontribuisaun tinan 2024, totaliza $64.115,25. Husi montante ne’e, total gastus ba selu professor kontratadu, seguransa no cleaner durante tinan ida hamutuk $61.560,00, nune’e eskola iha saldo $2.555,25.
Atualmente, total estudante iha ESG. LAT Lospalos hamutuk ema nain 582, ne’ebé kompostu husi estudante 10.º ano ema nain 171, estudante 11.º ano ema nain 193, no estudante 12.º ano ema nain 218. Enkontru ne’e hetan partisipasaun máximu husi ema nain 39, kompostu husi professores no pesonal administrasaun.
*
Hakerek textu : Ekipa ESG. LAT Lospalos
