Sekretariadu Estadu ba Komunikasaun Sosiál (SEKOMS ) entrega sertifikadu ba partisipante husi eskola ESG. Lare Anan Timur Lospalos ne’ebé partisipa ona iha treinamentu “ Swipe Safe, Jornalismo Básico e Utilização de Plataforma Jornal Parede Digital “ ne’ebé hala’o fulan hirak liubá iha sexta feira ne’e ( 20 / 02/2026 ).
Parte Finansas / Logistik SEKOMS – DNDM , Danilo Guterres , hateten hetan orientasaun atu entrega setifikadu formasaun ba partisipante ne’ebe SEKOMS , ChildFund no Ministériu Edukasaun realiza ona.
“ Bazeia formasaun ne’ebe SEKOMS, Childfund no Ministériu Edukasaun fó ba eskola sira iha fulan hira liu bá ami mai atu entrega sertifikadu ba partisipante ne’ebe partisipa ona, inklui partisipante husi eskola ESG. Lere Anan Timur Lospalos,” parte finansas / Logistik SEKOMS hateten.
Nia akresenta katak sei iha formasaun hanesan maibe realiza iha munisipio Manatutu.
“ Sei iha rotasaun ba formasaun ne’e, iha tinan 2025 hala’o iha munisipiu Lautem no tinan ida ne’e , ChilfdFund sei fó formasaun Swipe Safe ba eskola iha Manatutu semana oin mai, “ nia akresenta.
Partisipante formasaun husi eskola ESG. LAT Lospalos Sudaryatin, agradese no sujere para sei iha formasaun kontinua.
“ Agradese ba SEKOMS ne’ebe servisu hamutuk ho ChildFund no Ministériu Edukasaun ne’ebe fó formasaun ona mai ami, nu’une ami nia eskola agora iha ona Jornal Parede Dijital ho kunhesimentu naton ami koko hakerek notisia no publika ami aktividade nu’une estudante no sociedade bele asesu ,” Sudaryatin hateten.
Sudaryatin sujere para realiza tan formasaun kontinua nu’une bele profundu kunhesimentu manorin iha area jurnalizmu.
Entretantu formasaun ne’e realiza ona iha dia 8 -10 Setembru 2025 no partisipante husi eskola ESG. Lere Anan Timur Lospalos hamutuk ema nain tolu (3) Sudaryatin, Marliani da Silva no Agostinho Pinto Lopes.
*
Hakerek Textu : Ekipa ESG. LAT Lospalos
