Estudante husi Eskola Secundária Jeral (ESG) Lere Anan Timur Lospalos hahu ona ijame primeiru periodu tinan 2026 iha loron tersa feira ne’e (07/04/2026) . Iha loron dahuluk ne’e estudante hamutuk sia (9) la partisipa .
Responsavel ba ijame primeiru periodu ano eskolar 2026 , Rita da Costa relata katak, iha loron dahuluk ne’e ijame lao diak no estudante ne’ebe la tuir ijame hamutuk ema nain sia (9).
“ Ijame ba loron dahuluk ne’e lao diak maske estudante balun sei preukupa konaba seidauk simu kartaun ijame tanba seidauk selu propinas eskola nian . Estudante hamutuk sia (9) mak la tuir ijame , kompostu husi estudante 100 ano nain haat (4) no estudante 110 ano nain lima (5), husi estudante sia (9) ne’e estudane ida mak moras no sira seluk la iha informasaun ne’ebe hato’o ba komisaun ijame nian ,” responsavel ijame primeiru periodu ne’e relata.
Diretur eskola ESG. LAT Lospalos , Olandino da Costa Belo, L.Ap. informa katak prosesu ijame primeiru período ne’e la’o diak no kontroladu.
“ Realizasaun ijame primeiru periodu ne’e la’o diak tuir orientasaun husi Ministeriu Edukasaun , vijilante sira tama no sai pontual tuir orariu ne’ebe diretiva eskola estabelese , no maioria estudante sira partisipa ho disiplinu no respeita regra sira durante ijame,” diretur informa.
Ijame prmeiru periodu ba loron dahuluk iha materia tolu ( 3) , primeiru hahu ho dixiplina Matemátika ba programa Ciências e Tecnologias (CT) no Economia e Métodos Quantitativos ba programa Ciências Sociais e Humanidades (CSH) , segundu dixiplina jerál lingua Indonesia no ikus dixiplina Desporto.
Entretantu ijame primeiru periodu ne’e hala’o durante semana ida, hahu husi loron tersa feira semana ne’e, (07/04/2026) no sei termina iha loron segunda feira (13/04/2026 ). Total partisipante ba ijame primeiru periodo tinan 2026 ne’e, hamutuk estudante nain atus lima hitu nulu resin tolu (573) kompostu husi estudante 100 ano hamutuk atus ida hitu nulu resin rua (172) , estudante 110 hamutuk atus ida sia nulu resin rua (192) no estudante 120 ano hamutuk atus rua’sia ( 209 ) . Husi númeru estudantes ne’e, sira utilija sala de aula hamutuk 14 , ne’ebe kada sala priense estudantes haat nulu resin ida (41) , misturadu husi estudante 100 ano , estudante 110 ano no estudante 120 ano.
*
Hakerek Textu : Ekipa ESG. LAT Lospalos
